Act 10 | NdeIBE | STEP | EKhesariya kwakulendoda eyayithiwa nguKhoneliya, ingumlawuli webutho lekhulu elalithiwa liViyo lase-Ithaliya.

Acts 10

UKhoneliya Unxusa UPhethro

1 EKhesariya kwakulendoda eyayithiwa nguKhoneliya, ingumlawuli webutho lekhulu elalithiwa liViyo lase-Ithaliya. 2 Yena lendlu yakhe yonke babekhonza, bemesaba uNkulunkulu; wayenika ngesihle labo abaswelayo njalo ekhuleka kuNkulunkulu kokuphela. 3 Ngelinye ilanga kungaba lihora lesithathu emini waba lombono. Wabona kamhlophe ingilosi kaNkulunkulu, yeza kuye yathi, “Khoneliya!”

4 UKhoneliya wayiqhuzulela amehlo esesaba. Wabuza wathi, “Kuyini, Nkosi?” Ingilosi yaphendula yathi, “Imithandazo yakho lezipho zakho kwabampofu sekufinyelele kuNkulunkulu kwaba yisikhumbuzo. 5 Ngakho thuma amadoda eJopha ayobuya lendoda ethiwa nguSimoni ebizwa ngokuthi nguPhethro.

6 Ihlala loSimoni ongumkhuhli wezikhumba olendlu okhunjini lolwandle.”

7 Ingilosi eyakhuluma laye isihambile, uKhoneliya wabiza izinceku zakhe ezimbili kanye loyedwa owayengumncedisi webutho owayeyindoda ekhonzayo. 8 Wabatshela konke okwakwenzakele wasebathuma eJopha.

Umbono KaPhethro

9 Sekungaba phakathi laphakathi kwemini sebebanga edolobheni, uPhethro wakhwela ephahleni ukuyakhuleka. 10 Wezwa eselambile esefuna ulutho lokudla, kwathi ukudla kusalungiswa wehlelwa yisiyeziphupho.

11 Wabona izulu livulekile, kusehliselwa emhlabeni ulutho olwalunjengelembu elikhulukazi libanjwe ngamagumbi alo womane.

12 Lalithwele yonke imihlobo yezinyamazana ezilezinyawo ezine, kanye lezinanakazana zomhlaba lezinyoni zemoyeni. 13 Ilizwi laselimtshela lathi, “Vuka, Phethro. Bulala udle.”

14 UPhethro waphendula wathi, “Hatshi, Nkosi! Kangikaze ngidle lutho olungahlanzekanga lolungcolileyo.”

15 Laphinda ilizwi lakhuluma okwesibili kuye lathi, “Akungabilalutho olubiza ngokuthi kaluhlanzekanga oseluhlanjululwe nguNkulunkulu.”

16 Lokhu kwenzakala kathathu, kwasekusithi masinyane ilembu labuyiselwa ezulwini.

17 Kwathi uPhethro esamangele ngokuthi umbono lowo wawusitshoni, amadoda ayethunywe nguKhoneliya ayibona indlu kaSimoni ema entubeni. 18 Akhuleka abuza ingabe uSimoni owayethiwa nguPhethro wayehlala khonapho yini.

19 Kwathi uPhethro elokhu esacabanga ngombono, uMoya wathi kuye, “Simoni, kulamadoda amathathu akudingayo. 20 Ngakho phakama wehlele phansi. Ungathandabuzi ukuhamba lawo, ngokuba ngiwathumile.”

21 UPhethro wehla wathi kulawo madoda, “Nginguye lowo elimdingayo. Lilandeni?”

22 Amadoda aphendula athi, “Sivela kuKhoneliya umlawuli wekhulu lamabutho. Ungumuntu olungileyo owesaba uNkulunkulu, ohlonitshwa yibo bonke abesiJuda. Ingilosi engcwele imtshele ukuthi kakulethe endlini yakhe ukuze ezwe lokho ongabe uyakutsho.”

23 UPhethro wasewangenisa endlini amadoda lawo njengezethekeli zakhe.

UPhethro Endlini KaKhoneliya

Ngosuku olulandelayo uPhethro wasuka labo, kwathi labanye abazalwane abeJopha bahamba laye. 24 Ngelanga elilandelayo wafika eKhesariya. UKhoneliya wayesebalindele esebize izihlobo zakhe labangane abaseduze.

25 Kuthe uPhethro engena uKhoneliya wamhlangabeza wazilahla phansi ezinyaweni zakhe ngenhlonipho. 26 Kodwa uPhethro wamsukumisa. Wathi, “Sukuma, mina ngingumuntu nje.”

27 UPhethro wangena endlini elokhu ekhuluma laye wafumana ixuku labantu elikhulu. 28 Wathi kubo: “Liyakwazi ukuthi kungaphandle komthetho wethu ukuthi umJuda ahlanganyele loweZizwe loba ukuthi amethekelele. Kodwa uNkulunkulu usengitshengisile ukuthi kangingakutsho ukuthi omunye umuntu kahlanzekanga loba ungcolile.

29 Yikho kuthe lapho ngibizwa lapha, ngahle ngeza ngingazange ngibalise lokhu lalokhuyana. Sengibuza-ke manje, ungibizelani?”

30 UKhoneliya waphendula wathi, “Ezinsukwini ezine ezedlulileyo ngangisendlini yami ngikhuleka ngalonaleli ihora, ngehora lesithathu emini. Masinyane indoda eyayigqoke ezikhazimulayo yema phambi kwami, 31 yathi, ‘Khoneliya, uNkulunkulu usewuzwile umkhuleko wakho wakhumbula lezipho zakho kubayanga. 32 Hamba ubize uSimoni othiwa nguPhethro eJopha. Wethekele emzini kaSimoni umkhuhli wezikhumba, ohlala malungana lolwandle.’ 33 Yikho ngahle ngathuma abantu kuwe ngokuphangisa, kwaba kuhle ukuthi lawe uze. Manje sonke sesikhona lapha phambi kukaNkulunkulu ukuthi sizwe konke iNkosi ekuyale ukuthi usitshele khona.”

34 UPhethro waseqalisa ukukhuluma wathi: “Sengibona khathesi ukuthi uNkulunkulu kathandi abanye kulabanye abantu 35 kodwa wamukela abantu benhlanga zonke abamesabayo, abenza okulungileyo. 36 Yilo leli ilizwi uNkulunkulu alithumela kubantu bako-Israyeli, elikhuluma ngezindaba ezinhle ezoxolo ngoJesu Khristu oyiNkosi yabo bonke.

37 Liyakwazi osekwenzakele kulo lonke elaseJudiya, kusukela eGalile ngemuva kobhaphathizo olwatshunyayelwa nguJohane –

38 ukuthi uNkulunkulu wamgcoba kanjani uJesu waseNazaretha ngoMoya oNgcwele langamandla, lokuthi wahamba izindawana zonke esenza ubuhle njalo esilisa bonke ababesemandleni omubi, ngokuba uNkulunkulu wayelaye.

39 “Singofakazi bakho konke akwenzayo elizweni labaJuda laseJerusalema. Bambulala ngokumlengisa emthini, 40 kodwa uNkulunkulu wamvusa kwabafileyo ngosuku lwesithathu, wakwenza ukuthi abonwe. 41 Kabonwanga ngabantu bonke, kodwa ngofakazi uNkulunkulu ayevele esebakhethile – yithi thina esadla sanatha laye ngemuva kokuvuka kwakhe kwabafileyo. 42 Wasilaya ukuba sitshumayele ebantwini bonke njalo sifakaze ukuthi unguye uNkulunkulu ambekayo ukuba ngumahluleli wabaphilayo labafileyo. 43 Bonke abaphrofethi bafakaza ngaye ukuthi bonke abakholwa kuye baphiwa ukuthethelelwa kwezono ngebizo lakhe.”

44 UPhethro elokhu esakhuluma amazwi la uMoya oNgcwele wehlela kubo bonke abalizwayo ilizwi.

45 AbaJuda, amakholwa asokiweyo ababeze loPhethro bamangaliswa yikuthi uMoya oNgcwele wawuthululelwe lakwabeZizwe.

46 Phela babezwa bekhuluma ngezindimi bedumisa uNkulunkulu. UPhethro wasesithi, 47 “Kambe ukhona yini umuntu ongalela abantu laba ukuba babhaphathizwe ngamanzi na? Sebemukele uMoya oNgcwele njengathi.” 48 Wasesithi kababhaphathizwe ebizweni likaJesu Khristu. Yikho base becela uPhethro ukuthi ahlale labo okwezinsukwana ezithile.